Killers ni Liu kinahanglang mataral - Oaminal

CEBU, Philippines - Gihagit sa anti drug crusader sa Sugbo ang kapulisan paghimo og mas makuting imbestigasyon aron matumbok ug mataral sa hukmanan ang responsable sa pagpatay sa kanhi whistleblower nga si Bernard Liu.

Sentro sa hagit ni kanhi Dangerous Drugs Board (DDB) undersecretary Paul Clarence Oaminal nga mohingusog alang sa dinaliang kasulbaran sa nahitabong pagpatay ni Liu.

Si Liu maoy usa sa mga star witness ni kanhi kongresista Antonio Cuenco chairman kaniadto sa Committee on Dangerous Drugs nga mipahigayon og congressional inquiry kaniadto batok sa utok sa pagpayuhot og gidiling drugas.

Si Oaminal maoy nagsilbing naghatag og proteksiyon sa siguridad kaniadto ni Liu subay usab sa kamanduan ni Cuenco ug hangtud nga gipangitaan og paagi ni Oaminal nga mabutang sa proteksiyon sa Philippine Drugs Enforcement Agency PDEA-7 ubos ni director Randy Pedroso.

Apan dihang mipauli sa iyang pinuy-anan si Liu sa dakbayan sa Talisay gihatagan kini og liaison si Liu gikan sa PDEA alang sa iyang seguridad tungod sa drug expose niini nga naglambigit sa magsuong Peter ug Wellington Lim nga kanhi mga agalon ni Liu.

Apan matud ni Oaminal nga human siya gitangtang sa katungdanan kaniadto ni kanhi Presidente Gloria Arroyo ug nahulipan si PDEA-7 director Pedroso gitangtang na usab ang liaison agents ni Liu gikan sa PDEA. Nunot niini gitataw ni Oaminal nga kun aduna pay nagbantay kang Liu buhi pa kini.

Ang kapulisan mikompirmar na nga dunay foul play sa kamatayon niini apan sa pagkakaron wala pa gihapon silay gidudahang tawo. (BANATNEWS)