CEBU, Philippines - Giaprobahan na ni Governor Gwendolyn Garcia ang P7.1 milyones nga gahin alang sa pag-ugmad sa Eco-Larsian project sa kagamhanan sa lalawigan diha sa palibot sa Fuente Osmeña ning dakbayan sa Sugbo.
Matud pa ni Provincial Engr. Eulogio Pelayre nga sa wala pa mogikan ang gobernador paingon ngadto sa Jeju Island sa South Korea aron sa pagtambong sa Inter-Island Tourism Policy (ITOP) Forum, napirmahan na niini ang maong proyekto.
Si Pelayre miingon nga nakompleto na ang tanang mga papeles alang sa pagsugod sa maong proyekto ning buwan sa Oktubre nga gitakdang matapos usab sa Nobiyembre.
Kini tungod kay gihatagan lamang sa gobernador og duha ka buwan ang kontraktor sa paghuman sa maong proyekto.
Busa sa buwan sa Disyembre makita ug masud-ong na sa tanan ang dapit sa Larsian nga bag-o na ang panagway niini nga mahimo nang usa ka laing landmark ning dakbayan alang sa mga turista.
Matud pa ni Pelayre nga segurado kaayong makadani sa mga langyaw ug lokal nga turista ang maong proyekto tungod sa katalagsaon niini ilabi na gamiton na niini ang nadiskobre nga bottle bulb.
Ang kasamtangang vendor sa Larsian temporaryong ibalhin sa dili kaayo layo nga dapit ug ibalik sila sa Larsian center kun mahuman na ang pagpanday sa proyektong pagpatahom niini. Gituohan ni Pelayre nga usa kini ka proyekto sa lalawigan nga makahatag usab og dugang kinitaan sa Kapitolyo. (BANATNEWS)