Imported nga karne gimonitor

CEBU, Philippines - Higpit nga gibantayan sa kagamhanan sa dakbayan sa Mandaue ang mga imported nga karne nga gibaligya sa sulod sa merkado publiko aron pagsiguro   nga luwas ang panglawas sa mga konsumedor niini.

Si Dr. Daisy Penetrante nga maoy city veterinarian sa maong dakbayan nga nahinabi sa Banat News miklaro nga wala nila idili sa hingpit ang pagpamaligya sa imported nga karne sa nahisgotang merkado apan ila kining gimonitor pag-ayo.

Gitataw niya nga ilang gisiguro nga ang maong mga imported nga karne ikasulod   gayud og freezer sa mga namaligya ug dili mahikap ni bisan kinsang tawo aron dili    makontaminado sa kagaw.

Si Penetrante miingon nga sukad pa niadtong miaging tuig gihimo na nila ang higpit nga pag-monitor sa mga karneng gikan sa gawas nga giladlad sa merkado sa Mandaue.

May pipila na ka vendor nga nasakmitan nila og mga karne   tungod kay yano lang kining giladlad sa ilang mga lamesa nga naghagit sa mga kagaw sa sayon nga pagtapot niini.

Busa giawhag ni Penetrante ang mga importer og karne nga magbaton og freezer nga kapabugnawan sa ilang mga karne aron dili kini masakmit sa mga otoridad.

Si Dr. Penetrante miingon nga adunay mga tawo nga gikan sa iyang buhatan uban sa mga market guard sa merkado publiko sa dakbayan nga ilang gidestino ug gitahasan sa pagbantay sa mga karne sulod sa merkado sa dakbayan. (BANATNEWS)