Welga sa palea gisaway

CEBU, Philippines - Wala mopabor   ang pangulo sa Provincial Employment Services Office (PESO) sa gilusad nga welga sa mga kawani sa Philippine Air Lines (PAL) nga nakahasol sa mga negosyante ug mga pasahero ilabi na sa mga turista.

Si Dr. Mathea Baguia, hepe sa PESO mibutyag nga usa ka   dakong sayop ang gihimo sa mga sakop sa Philippine Air Lines Employees Association (PALEA) tungod kay nakahatag kini og di maayong epekto sa ekonomiya sa nasud.

Si Baguia miingon nga miduol unta ang mga sakop sa PALEA ug nakigsabot sa management sa PAL alang sa malinawon nga pagsulbad sa ilang problema.

Nasayran nga usa sa hinungdan sa welga nga gilusad sa taga PALEA mao ang pagkatangtang nila sa trabaho kay mokuha na og mga taga-gawas nga mga kawani ang tagdumala sa maong kompaniya.

Iyang giklaro nga ang out sourcing usa ka legal nga paagi sa pagpangempleyo sa mga kompanya ug may katungod ang PAL sa pagsagop niini.

Apan iyang gitataw nga mas maayo og nangayo na lamang unta sa maong package ang mga miyembro sa PALEA aron nga katugotan sila nga makabalik sa pagtrabaho   sa PAL. Sa welga nga ilang gilusad napalyar og usa ka adlaw ang biyahe sa tanang eroplano sa PAL ug kaliboan ka mga pasahero ang nalangan sa ilang biyahe samtang minilyon usab ka pesos ang   alkanse   sa mga negosyante.(WC)  (BANATNEWS)