Negosyante mitiyabaw sa Road Revo

CEBU, Philippines - Ang katuyoan sa road revolution project sa dakbayan sa Sugbu mas mahimo pang mapuslan kung kini ipadayon apan ipaagi sa maayong pagplano sumala pa sa mga sektor sa mga negosyante.

Si Cebu Chamber of Commerce and Industry president Samuel Chioson nagkanayon nga dako og kadaot sa negosyo ang gibunga sa road revolution sa mga dapit diin kini gipahigayon.

Apan buot niya karon nga kinahanglang molingkod ang mga organizers sa maong kalihukan uban kanilang mga negosyante aron ilang matuki ang angayang buhaton.

Matud pa ni Chioson nga mas mapalambo pa ang road revolution kung ikunsiderar una sa mga organizers ang dapit, oras, dalan, alternatibong rota.

 “Ato lang i-select ang area, date and time, dili nato ikalit nga dili i-inform, tarunga ang traffic,” matud pa ni Chioson.

Samtang gisugyot usab ni Chioson nga kinahanglang magpangutana pud ang mga organizers sa mga dapit diin mahitabo ang duha ka nagsunod nga road revolution kung mosugot pa ba sila nga aduna pay ikatulong road revolution nga himuon sa ilang lugar.

 “Kato apektado we will ask them uyon ba sad sila, it’s not fair for them also,” dugang pa ni Chioson.

Ang road revolution nga nakapalipay sa mga organizers tungod sa nakita nilang kalampusan gisaway usab sa habig sa mga sumasakay, motorista ug sa mga negosyanteng kansang pwesto maoy naapektahan.

Nunot sa mga nanggawas nga reklamo aduna nay mga opisyales sa dakbayan ang supak nga anha himoa ang ikatulong “road revolution” sa Osmeña Boulevard tungod kay kini magbunga og grabeng trapiko sa dakbayan. (BANATNEWS)