CEBU, Philippines - Si kanhi Capitol consultant Byron Garcia pormal na nga gipasakaan og kasong illegal possession of firearm sa Talisay City Prosecutor’s Office kagahapon sa alas 3:45 sa hapon.
Si SPO1 Joel Rosales ang imbestigador sa maong kaso mibutyag nga ang hepe sa Firearms and Explosives, Security Agencies Guards Supervision Section (FESAGS) nga si Supt. Rex Derilo miluwat na sa iyang affidavit kagahapon.
Ang maong kaso nanukad dihang si Garcia kinsa maoy presidente sa kapunongan sa mga homeowners sa Corona Del Mar subdivision sa barangay Pooc, Talisay, gireklamo sa usa ka Amerikano nga si Wayne Morris kay matud pa gipakitaan kuno siya sa AK-47 assault rifle niini.
Si Garcia sa maong higayon miangkon nga iyang gipakitaan ang maong langyaw sa iyang armas tungod kay nasuko kini dihang iyang gisita bahin sa gibutang nga speed bump niini tungod sa iyang balay nga makapasagunto sa mga sakyanang mosulod sa subdivision. Gani matud pa ni Garcia nga puwerting kurata sa Kano ug misutoy kini og dagan paingon sa ilang balay human makita ang sinaw kaayo niyang AK-47.
Apan ang maong armas ni Garcia lisensiyado ug boluntaryo niya kining gisurender ngadto kang Derilo. (BANATNEWS)