CEBU, Philippines - Nadakpan ang usa ka gipasanginlang manghimoay og armas ug lima niini ka mga trabahante atol sa gihimong pagpangronda sa mga sakop sa Criminal Investigation and Detection Group (CIDG)-7 sa miaging alas-11 sa buntag didto sa barangay Corte sa lungsod sa Carmen, Cebu.
Ang mga nangadakpan mao sila si Arnel Lozano Aresco, 24, nailang lider sa “Lozano Gang” nga nalambigit sa ilegal nga pagpanghimo, repair ug pagpamaligya og mga paltik.
Nasikop usab ang lima ka mga trabahante nga sila si Albert Capuyan, 20, Renan Lucero, 20, Dennis Capuyan, 25, firearms assembler, Juhaide Lumen, 18, laborer ug Rexter Lozano, 21, laborer pulos nagpuyo sa naasoy’ng lugar.
Ang ronda gipangulohan ni Insp. Joseph Montesclaros, sa CIDG, Criminal Investigation and Detection Team (CIDT) Chief Insp. Germano Mallari ug hepe sa Carmen Police Station Sr. Insp. Bonifacio Arriesgado nga gibase sa search warrant subay sa kalapasan sa Section 1 of Presidential Decree (PD) 1866 nga giamendar ngadto na sa RA 8294 nga giisyu ni Hon. Judge Enriqueta Loquillano-Belarmino, presiding judge sa RTC Br. 57 sa dakbayan sa Sugbu niadtong Septiyembre 27, batok kang Arnel Lozano.
Nakuha sa mga awtoridad ang duha ka kalibre 45 pistola, usa ka vintage Japanese pistol cal.8mm, upat ka unfinished cal.45 pistol lower receiver, tulo ka buhing bala sa cal.45, duha ka barrel sa cal.45 pistol, usa ka push drill, usa ka grinder, walo ka vice, 32 ka files, walo ka hacksaw, 30 ka hacksaw blades, upat ka fliers cutter ug tulo ka L square.
Hinuon ang ronda malinawon ug gisaksihan sa duha ka mga kagawad nga sila si Isidro Cando ug Catalino Lozano.
Si Chief Insp. Patrick Baño, tigpamaba sa CIDG-7 nga nahinabi sa mga tigbalita nagkanayon nga ilaha nang gipanid-an ang grupo ni Lozano nga nag-operate diha sa lungsod sa Carmen ug siyudad sa Danao nga nanghimo og armas, moayo ug mamaligya nga walay lisensya gikan sa Firearms Explosives Security Agencies Guards and Supervision Section (Fesagss).
Matud ni Baño naaktuhan ang grupo nga naghimo ug nag-repair sa armas ug nakurat nalang sa pag-abot sa mga polis.
Si Lozano nga nahinabi sa mga tigbalita mitug-an nga lima na siya ka tuig sa maong negosyo human makat-on sa iyang mga katiguwangan paghimo og armas. (BANATNEWS)