14-anyos gitabangag kulata patay

CEBU, Philippines - Napalgan nga patay na kagahapon sa buntag ang usa ka minor de edad nga lalaking nagbuy-od sa bakanteng luna sa Sta. Lucia Subdivision sa Poblacion Oriental, lungsod sa Consolacion nga gituohan sa kapolisan nga biktima sa pagpangulata hangtud namatay.

Si PO3 Alin Garciano sa kapolisan sa maong lungsod miingon nga taga barangay Tugbongan sa lungsod sa Consolacion ang biktima (pangalan gipugngan).

Matud pa ni Garciano nga ang maong patay’ng lawas nga napalgan sa kasagbutan gituohang gibunalan og gahing butang sa kalawasan ug sa ulo.

Nasuta nga ang maong lugar maoy estambayanan sa mga batan-on ilabi na sa mga minor edad diin sila mag-inom panahon sa kagabhion.

Atol sa pagsusi sa crime scene nahapay og maayo ang mga sagbot sa maong dapit hinungdan nga nagduda ang kapolisan nga gitabangan pagkulata ang biktima.

Matud pa ni Garciano nga nasigpatan pa sa mga molupyo sa maong dapit ang biktima sayo sa miaging gabii nga naglakaw paingon sa maong lugar.

Ang mga barkada sa biktima nga ilang gisukitsukit pulos mihimakak sa kalambigitan sa maong krimen ug nangangkong nag-iyahay sila og pamauli ala-1 pasado ang takna sa kaadlawon. (BANATNEWS)