CEBU, Philippines - Magsugod na karong adlawa ang pagsuroy-suroy sa mga pampublikong tunghaan sa siyudad sa Sugbo sa mga tinugyanan sa Department of Veterinary Medicine and Fisheries nga gipangulohan ni Dr. Alice Utlang alang sa ilang kampanya batok sa rabies.
Ang kaso sa rabies nga naggikan sa iro mitala na og 10 karong tuiga ikumpara sa siyam sa miaging tuig.
Matud pa ni Utlang nga angayan gyud nga pahimangnoan ang mga kabataan batok sa rabies ilabi na nga naa sa ilang talaan nga kasagaran sa kaso mapaakan og iro naa sa 15 anyos paubos.
“Duna man gu’y ubang bata nga kusog kaayo magpasipala sa mga iro maong mapaakan sila. Maong pahimangnoan nato sila nga dili unta nila hilabtan ang mga iro, kay wala ta kahibalo nga naa diay na’y rabies ang iro nga nakapaak nila,” sumala pa ni Utlang.
Ang siyudad gilangkoban og kapin sa 67,000 ka mga iro ang labing daghan nga kaso sa rabies natala sa barangay Lahug, Punta Princessa, Kalunasan, Cogon-Pardo, Zapatera, Binaliw, Guadalupe ug Basak San Nicolas.
Mipahimangno usab si Utlang sa publiko nga dili modangop sa tandok kung mapaakan og iro. “Ayaw gyud mo’g dangop anang tandok, kinahanglan nga moderetso gyud mo sa City Health, “pasidaan pa ni Utlang. - BANAT NEWS