Bokal Daan maoy gobernador

CEBU, Philippines - Si Provincial Board member Julian Daan mao karon ang kasamtangang gobernador sa lalawigan sa Sugbo samtang tua sa gawas sa nasud si Governor Gwendolyn Garcia ug Vice Governor Agnes Magpale.

Si Garcia ug Magpale tua sa Jeju Islands sa nasud sa South Korea aron pagtambong sa 3 ka adlaw nga Inter Island Tourism Policy ( ITOP) forum.

Sa paggikan sa duha ka haliging mga opisyal sa Kapitolyo nadawat ni Daan ang memorandum order gikan sa gobernador nga nagtudlo kaniya nga magsilbing acting governor sulod sa tulo ka adlaw samtang wala sa ilang buhatan ang gobernador ug ang bise gobernador.

Si Daan daan nang mipatin-aw nga dili gyud unta siya buot molingkod sa maong posisyon tungod sa kadako sa responsibilidad niini.

Iyang gitataw nga niadtong higayona nga gikahinabi siya sa mga sakop sa media nakalitan lamang siya sa maong oportunidad nga wala niya dahoma sa tibuok kasaysayan sa iyang kinabuhi.

Sigun pa ni Daan nga iyang naklaro ang iyang responsibilidad isip kasamtangang gobernador sa lalawigan sa Sugbo gikan sa kamandoan sa gobernador.

Samtang giklaro sa gobernador nga iyang gidala si Bise Gobernador Magpale sa maong kalihukan tungod sa kalapad sa kasinatian niini bahin   sa maong forum   kay   ang ITOP usa man sa gitamod nga grupo sa natad sa turismo.

Iyang gitataw nga ang kagamhanan sa lalawigan sa Sugbo giimbitar isip observer province sa maong kalihukan sanglit dili pa man miyembro ang probinsiya sa maong forum.

Apan gitataw sa gobernador nga iyang gitinguha nga mahimong miyembro ang Sugbo sa ITOP aron molapad ang kahigayonan nga ma-promote ang turismo sa Sugbo. - Chester Abadilla/WC (BANAT NEWS)