Misunog sa balay gipangita sa kapolisan

CEBU, Philippines - Padayong gipangita sa kapolisan ang 21 anyos nga lalaki nga gituohang liso og pangisip ug misunog sa usa ka balay didto sa Sitio Alyangaw barangay Guadalupe sa lungsod sa Alegria   sa miaging gabii.

Ang suspetsado nailhan nga si Elmer Mejares alyas Emboy, 21, ulitawo kinsa liso og pangisip ug gituohang maoy midaob sa maong balay.

Ang tag-iya sa pinuy-anan nga naugdaw mao si Mrs. Jesusa Libron kinsa mitumbok kang Mejares isip suspetsado nga mipaugdaw sa ilang balay.

Si PO1 Jupiter Elarcosa sa Alegria Police mibutyag sa Banat News nga gibana-bana sa kabomberohan ang danyos nga mokabat sa P80 mil.

Matud pa ni PO1 Elarcosa nga ang suspetsado daan nang nasayran ang pagkabadlungon niini, kanunay nga manghagis sa mga silingan, ang mga saging ug uban pang mga tanom gipamuril, kawatan , ug usa sa gikawat kuno niini mao ang usa ka motorsiklo apan nabawi sa tag-iya.

Midugang si PO1 Elarcosa nga upat ka higayun na nga napriso si Mejares tungod sa mga ginagmay’ng kaso sa pagpanghulga, ingon man pagpangawat.

Sa pagkakaron padayon pang gipangita sa kapolisan ang suspetsado. - Darrel A. Carumba/WC (BANAT NEWS)