Compostela tabangan gihapon

CEBU, Philippines - Gipasalig ni Gob. Gwendolyn Garcia ang padayong tabang ug suporta sa Kapitolyo ngadto sa lungsod sa Compostela bisan kinsa pa ang molingkod isip kasamtangang mayor.

Kini nunot sa hulgang pagkabakante na usab sa buhatan sa mayor gumikan sa gikatakdang pagbalhin kang Director Pedro Noval, Jr. kinsa maoy nahimong officer-in charge hangtud nga walay nakalingkod nga bisan usa ka napiling opisyal sa lungsod sukad niadtong eleksiyon sa tuig 2010.

Gisang-at na ni Noval ang maong problema ngadto sa ilang uluhang buhatan labot kung kinsa molingkod isip mayor sa higayun nga siya ibalhin na sa laing rehiyon.

Matud pa ni Garcia nga gikinahanglan gyud nga motudlo ang DILG og bag-ong caretaker sa lungsod aron maoy moatiman sa mga panginahanglan sa mga tawo.

Bisan sa kahimtang karon sa Compostela, si Garcia nakadayeg kaayo sa gipakitang labok sa lungsod sa pagsalmot sa kalihukan sa Kapitolyo sama sa bag-ohay lang gilusad nga Governor Unity Volleyball Cup.

“Inspite of their difficulties, this town is really trying its very best,” matud pa ni Garcia.

Nagpabiling haw-ang ang lokal nga kagamhanan sa lungsod sa Compostela gumikan sa wala gihapon nasulbad nga protesta ni kanhi Mayor Ritchie Wagas nga miresulta sa pag-anular sa proklamasyon sa mga napiling mga opisyal nga gipanguluhan ni Mayor-elect Joel Quiño, Vice Mayor-elect Maria Antoinette Dangoy ug mga konsehales. (Gregg M. Rubio/EIM) (BANAT)