Pasahero sa PAL nangatanggong

CEBU, Philippines - Gatosan ka mga pasahero sa Philippine AirLines ang nangatanggong sa nagkadaiyang airport sa nasud human mohunong sa pagtrabaho ang mga ground crew sa maong kompanya kagahapon sugod sa buntag.

Tungod niini napugos ang PAL sa pagkanselar sa ilang mga flights ug gipasalig nga mobalik kini sa ilang mga biyahe alas-6 sa gabii kagahapon (Martes).

Sa report sa DzBB nga gikutlo sa GMA News.Tv, ang tigpamaba sa PAL nga si Cielo Villaluna mipahibalo sa pagkanselar sa mga flights. Matud pa nga ang mga ground crew sa PAL nagsugod paghunong sa ilang trabaho alas 6:50 kagahapon sa buntag diha sa Ninoy Aquino International Airport Terminal 2.

Ang protesta gilusad agi og pagsupak sa pag-outsource sa mga trabaho sugod karong Oktubre 1.

Mipasidaan si Villaluna nga dakong kalapasan sa balaod ang gihimo sa mga kawani pagbiya sa ilang mga trabaho.

Apan ang PAL Employees Association (PALEA) president Gerry Rivera sa maong report miingon nga ilang ipadayon hangtud sa hangtud ang paghunong sa trabaho agi og pagpadayag sa ilang pagsupak sa planong pag-outsource sa PAL sa mga kawani sa departamentong walay labot sa flight operations.

Lakip ang mga pasahero sa PAL diha sa Mactan Cebu International Airport ang nagbagulbol tungod sa pagkalangay sa ilang flights. Ang uban kanila nagpa-rebook nalang ug ang uban mibalhin sa ubang airline. (Edwin Ian Melecio ug report gikan sa Wires) (BANAT)