Tag-iya'g manggahan gipatay

CEBU, Philippines - Usa ka mag-uumang lolo nga nanag-iya’g kamanggahan ang gipusil patay makadaghang higayon diha sa iyang umahan kagahapon sa buntag sa bukirang lugar sa Cambinocot siyudad sa Sugbu.

Si Filipe Archival, 74, taga Purok 4 Ibabao sa maong barangay gitabangan og pusil sa tulo ka wala mailhing armadong mga lalaki kagahapon sa buntag.

Si Nelson, 43, anak sa biktima mitug-an sa kapulisan nga diha sila sa iyang amahan sa umahan apan mipauli siya aron mamahaw apan paglabay sa pipila ka minutos nakadungog nalang sila og sunod nga buto sa armas.

Si PO3 Ruth Violango sa Homicide Section sa Cebu City Police Office (CCPO) mitug-an nga usa ka mag-uuma nga babaye maoy nakakita giunsa ang biktima pagpusil patay sa tulo ka mga kriminal.

Matud ni Violango ang maong babaye pipila lang ka metros gikan sa nahimutangan sa biktima diin nakita niini ang tulo ka armadong mga lalaki nga nagtaptap sa ilang mga nawong nga naglakaw paingon sa nahimutangan sa biktima.

Narekober sa kapulisan diha sa crime scene ang duha ka empty shells sa wala pa matinong kalibre sa armas duol sa gihagbaan sa biktima. Samtang usa ka gituohang silencer ang narekober sa mirespondeng sakop sa Special Weapons and Tactics sa lugar.

“Amo pa gi-consider tanan nga mga angle kay matud sa iyang mga silingan buotan ug wala man siyay kaaway,” matud ni Violango. (Rey B. Pasaporte/EIM) (BANAT)