Kamatayon ni Balingit imbistigahon

CEBU, Philippines - Usa ka imbistigasyon ang ilusad sa City Intelligence Branch (CIB) sa Cebu City Police Office (CCPO) bahin sa kamatayon ni Antonio Balingit ang makinista sa pump boat nga gisakyan ni Jun-Jun Cabando, ang tulisang samdan sa sampot nga miikyas duha ka adlaw human mapuo ang tulo niya ka kaubang tulisan sa napakyas   nilang tulis sa usa ka teller sa bangko dinhi sa dakbayan sa Sugbo sayo ning buwana.

Si Chief Insp. Romeo Santander, hepe sa CIB nga nahinabi sa mga tigbalita kagahapon miingon nga ila pang gipaabot ang resulta sa awtopsiya sa patay’ng lawas ni Balingit.

Ang patay’ng lawas ni Balingit napalgan nga naglutaw sa kadagatan sa barangay Tangke, dakbayan sa Talisay niadtong Sabado kansang tuong dunggan nabuslot.

Matud ni Santander nga kun ang resulta sa autopsy magpasabot nga adunay foul play sa kamatayon sa maong makinista anha pa sila mopahigayon og imbestigasyon aron mahibaw-an ang hinungdan sa kamatayon niini.

Si Balingit maoy makinista sa pumpboat nga Inday Irish ug usa siya sa duha nga mihatud sa samaran nga lider sa Quiapo Cabando Robbery Group nga si Dionesio Cabando alyas Jun-Jun Cabatingan paingon ngadto sa Panglao Bohol human sa ilang pakyas nga pagtulis sa teller sa China Bank sulod sa Robinson department store niadtong Septembre 5, 2011.

Sa pakig-engkuwentro nila sa kapolisan sa dakbayan sa Sugbo namatay ang tulo ka mga sakop ni Cabando samtang siya nabuslotan usab sa sampot agi sa bala sa armas  sa polis.

Si Balingit dihang giimbistigar sa kapolisan mitug-an nga wala siya masayud nga tulisan ang mipakyaw sa pump boat nga iyang gidala kay nagsul-ob niadtong tungora og duster si Cabando ug buwagaw ang binabayeng buhok niini nga gisakwat   pa sa mga kauban niini sa pagsakay sa pump boat.

Matud ni Santander nga base sa iyang pakisusi, walay samad nga nakit-an ang patay’ng lawas ni Balingit apan bisan pa niini iyang giawhag ang mga tagtungod sa biktima nga kinahanglang ipailawom gyud sa awtopsiya ang patay’ng lawas sa biktima aron masuta kun wala bay foul play ang kamatayon niini.

Matud ni Santander kun adunay foul play ang kamatayon ni Balingit iyang ipatawag pag-usab ang kauban niini sa pump boat nga mikarga  kang Cabando.

Gitataw ni Santander nga sa affidavit ni Balingit positibo gyud nga giila niini si Jun-jun Cabando human ipakita nila ang hulagway niini didto sa buhatan sa   CCPO uban sa tag-iya sa pumpboat. (Rey B. Pasaporte/WC) (BANAT)