Away sa manag-agaw tanod patay, anak kritikal

CEBU, Philippines - Patay ang usa ka tanod ug kritikal ang kahimtang sa iyang 20-anyos nga anak human gipanunggab sa ilahang ig-agaw sa barangay Lipanto sa lungsod sa Alegria niadtong Domingo sa alas 7:45 sa gabii.

Ang biktima nga patay diha-diha human makaangkon og duha ka samad dinunggaban sa dughan ug naigo ang kasingkasing mao si Jose Ygonia, 45, tanod sa maong lugar samtang kritikal ang kahimtang sa anak niining si Johnrey Ygonia.

Gitumbok nga midunggab sa duha mao ang ig-agaw sa tanod nga si Roque Ybas, 46.

Matud ni SPO2 Arnold Omania, imbestigador sa Alegria Police Station dihang nahinabi sa Banat News nga dunay nahitabong away nga nisampot sa pinusilay tali nila ni Julian Ygonia Jr., nga pag-umangkon sa mga biktima ngadto sa usa ka Renato Ybas.

Giingong pulos armado sila si Julian Ygonia ug Renato Ybas hinungdan nga nahitabo ang pinusilay apan way naigo hinungdan nga miresponde ang tanod nga si Basillo Ybas.

Si Renato daling nakasibat pahilayo ug dihang gikomprontasi ni Basillo milaban si Julian ug anak niini ug giharong ang tanod.

Diha-diha miduol ang suspek ug dayong banghag sa pag-ingon “Unsa man molaban ka!” dungan sa pagdunggab sa duha. Ang anak sa namatay naigo sad sa tiyan ug bukton.

Ang biktima nga si Jose patay diha diha samtang ang anak niini daling gihatod sa tambalanan.

Samtang ang suspek nadakpan sa mga polis sa iyahang pinuy-anan ug nagtingkagol na karun sa karsel samtang gihikay ang kasong ipasaka. (Darrel A. Carumba/EIM) (BANAT)