Pundok sa mga taksi misaway sa Road Revo 2

CEBU, Philippines - Nadismaya pag-ayo ang pundok sa mga taksi dinhi sa Sugbu nunot sa lain na usab planong pagpahigayon og Road Revolution karong Oktubre 23 nga pasiugdahan gihapon sa environmentalist group.

Ang presidente sa Bantay Taxi Association nga si Jammy Llanos miingon nga wala siya mahimuot sa nahitabong road revolution niadtong Sabado tungod kay nakahasol kini pag-ayo sa publiko.

Matud pa niya nga naapektohan gyud ang ilang kinitaan niadtong higayona busa dili siya uyon nga duna na pu’y laing road revolution ug kung duna man adto kini ipabuhat sa South Road Properties.

Ang gikatakdang road revolution karong Oktubre 23 himuon sa Osmeña Boulevard kung diin ang tunga sa dalan maoy gamitong pedestrian samtang ang laing katunga maoy agian sa mga sakyanan.

Nagpadala na og suwat ngadto sa Cebu City Traffic Operations Management (Citom) ang usa sa mga lider sa maong kalihukan nga si Atty. Antonio Oposa alang sa maong katuyuan ug tun-an pa kini sa maong departamento ang nahisgutang proposal.

Kahinumduman nga nakadawat og daghang tawag ug reklamo ang buhatan sa CITOM kalabot sa road revolution niadtong Sabado .

Giingong daghang mga tawo ang nagbagulbol gumikan kay wala kauyon gumikan kay ang naapektahan mao ang downtown area nga maoy kasagarang agian sa sakyanan. (Sanden J. Anadia/EIM)  (BANAT)