CEBU, Philippines - Patay nang napalgan ang 16-anyos nga menor de edad nga giingong suspek sa pagpanunggab og laing batan-on human kini gikatahong gi-pickup sa duha ka mga lalaking nagmotor nga ‘tinagalog’ ang pinulongan.
Ang biktima (pangalan gipugngan) napalgan nalang nga nagbuy-od daplin sa dalan nga dunay samad pinusilan sa ulo sa sitio Magay barangay Balidbid sa lungsod sa Sta. Fe sa isla sa Bantayan.
Duha ka mga lalaking sakay og motorsiklo ang gitumbok sa mga nakasaksi nga maoy mi-pickup sa biktima gikan sa ilang pinuy-anan sa barangay Balidbid.
Matud ni PO2 Andy Galorio sa Sta. Fe Police dihang nahinabi sa Banat News nga ang duha ka mga lalaki giingong miimbitar sa biktima kay magpakuyog kanila nga mamalit og cellphone sa lungsod sa Bantayan.
Daling niangkas sa luyo ang biktima ug paglabay sa usa ka oras napalgan nalang kini daplin sa dalan nga nagbuy-od na ug nagkadugo nga wala nay panimuot.
Ang mirespondeng mga polis midala sa biktima sa Bantayan District Hospital apan gideklarar ni Dr. Jackylou Sandigan nga dead on arrival. Giingong aduna kini duha ka samad pinusilan sa ulo.
Ang kapulisan naka-recover sa crime scene og usa ka kabhang ug usa ka deformed slug sa 40. caliber pistol ingon man usa ka tsinelas kolor puti.
Ang kapulisan padayun pa sa ilang imbestigasyon pag-ila sa duha ka mga lalaki.
Samtang dugang nahipos nga impormasyon nga ang biktima suspek usab kini sa pagpanunggab sa laing batan-on dili pa dugay apan wala hinuon mamatay apan igo lang nabilanggo og pipila ka adlaw ang biktima ug gi-turnover sa Department of Social Welfare and Development (DSWD) kay menor de edad pa ug gi-areglo usab ang maong kaso. (EIM) (BANAT)