Simbahan gilungkab

CEBU, Philippines - Wala mahinayon ang unta pag-ampo sa mga sakop sa Jehovah’s Witness sa sitio Suba, barangay Poblacion sa lungsod sa Argao human nila madiskubrehing gikawat ang ilang sound system ug donation box niadtong Domingo sa alas 9:15 sa buntag.

Ang nahanaw nga butang mao ang brand new nga sound system sa ilang simbahan nga gamiton sa ilang pag-ampo ingon man ang dakung donation box sa atubangan nga dunay gibanabanang sulod nga moabot ug kapin sa P3 mil nga donasyon.

Ang representante sa Jehovah’s Witness Church nga si Roy Alfafara maoy nakadiskobre nga gikawat na ang ilang mga butang dihang iyang giablihan ang simbahan aron mangandam.

Matud ni PO2 Bernie Lao sa ilang imbistigasyon gigabas ang padlock sa simbahan ug pagkahuman giguba niini ang door knob aron makasulod ang mga kawatan ug dihang nakasulod gipanguha ang maong mga butang.

Ang kapulisan padayun pa sa ilang imbestigasyon pagtumbok sa mga responsable nga gituohang nahitabo niana pang pagkagabii.(Darrel Carumba/EIM) (BANAT)