Usa angol sa disko

CEBU, Philippines - Naangol ang usa ka minor de edad nga gipusil atol sa pagsayaw og disco sa Upper Sampaguita sa barangay Banilad, dakbayan sa Mandaue kalit lang gipusil alas-11 pasado ang takna sa miaging gabii.

Ang biktima nga 17- anyos, taga sitio Telecom sa barangay Casuntingan, dakbayan sa Mandaue nakaangkon og samad pinusilan sa bukton.

Gipangita pa karon sa kapolisan ang suspek nga nailhan lang sa pangalan nga ‘Magiemar’ ug giingon nga nagpuyo usab sa silingang sitio sa barangay Casuntingan.

Matud pa ni PO1 Ronald Balimbing sa homicide section sa kapolisan sa maong dakbayan, kuyog sa biktima ang iyang higala nga 16-anyos nga nanayaw sa maong diskohan.

Apan sa kalit lang gisukmag sa suspek ang biktima ug pagkahuman gipusil kini sa ulo apan nakahupo ang biktima ug naigo sa bukton.

Tungod sa buto sa armas nagkatibulaag ang mga tawo ug nakaikyas ang suspek samtang ang biktima gidala sa tambalanan sa Mandaue City Hospital.

Gisusi pa sa kapolisan ang sinugdanan sa kasuko sa suspek ngadto sa biktima. (BANAT NEWS)