Straw gigamit sa paghikog

CEBU, Philippines - Napalgang patay ang usa ka tawo sulod sa lawak sa iyang gipuy-an sa sitio Bakante sa barangay Banilad, dakbayan sa Mandaue alas-6 pasado ang takna sa miaging gabii.

Ang namatay mao si Marvin Jerome David, panuigon nga lumad nga taga Laz Piñas sa Metro Manila ug kawani sa Personal Collection sa dalan A.S. Fortuna sa barangay Banilad, dakbayan sa maong dakbayan.

Si PO1 Roldan Balimbing sa homicide section sa kapolisan sa maong dakbayan miingon nga nadiskubrehan sa mga silingan ang maong patay’ng lawas dihang ilang namatikdan ang nagtulo nga dugo gikan sa sulod sa lawak sa namatay.

Si Cristina Yutong, 23, silingan sa namatay maoy nagpahibalo sa kapolisan kabahin sa maong dugo hinungdan nga gisusi kini sa kapolisan.

Dihang ilang naablihan ang lawak ilang nakit-an si David nga may hikot nga straw sa liog nga gituohang maoy nakaingon sa kamatayon niini.

Nagtuo ang kapolisan nga nasubrahan ang kahugot sa paghigot sa straw sa liog ni David maong nasamad kini ug nagdugo.

Wala pa maestablisar kung naghikog ba ang biktima apan matud pa ni Balimbing nga sa pagsusi sa mga imbestigador sa lawak niini walay nakit-ang timailhang nagkagulitang ang kabtangan ni David.         

Hinuon ang mga sakop sa Scene on Crime Operation (SOCO) sa PNP Crime Laboratory naghimo pa og dugang pa nga pakisusi ang mga sakop sa Scene on Crime Operation (SOCO) 7 sa kapolisan. (BANAT NEWS)