CEBU, Philippines - Mga polis sa Mandaue City Police Office (MCPO) nga dili molupyo sa maong dakbayan gibalhin og destino nunot usab sa pagpatuman sa localization program nga gipatuman sa ilang kadagkoan. Si Senior Superintendent Noel Gillamac, direktor sa MCPO nga nahinabi sa Banat News miingon nga ubos sa maong programa gikinahanglang ang mga polis nga idestino sa buhatan sa kapolisan sa usa ka dapit mga residente usab sa maong lugar.
Gipasabot niya nga ang tumong sa localization program mao nga dili na maglisod pa ang maong mga polis pagtambong sa trabaho.
Matud pa ni Gillamac nga sa karaan nga pamaagi nga ang mga polis bisan asa lamang idestino nga mga lugar hinungdan nga ang kadaghanan sa mga polis mahilayo usab sa ilang pamilya.
Si Gillamac miingon nga ang tanan niyang mga sakop nga gidestino sa lainlaing buhatan sa MCPO nga naglakip sa administrative office, operation office, traffic division, Police Community Relation, (PCR) ug mga nadestino sa unom ka presinto maoy naapektohan sa maong localization program nga gipatuman sa PNP.
“Ang katuyoan man gud sa localization program sa PNP mao nga mapaduol ang mga polis sa ilang mga pamilya,” ni Gillamac pa nga nahinabi sa Banat News.
“Kay ang nahitabo man gud nalayo ang mga polis sa ilang pamilya sa pagdestino kanila ngadto sa laing dapit,” dugang pasabot niini.
Nunot sa maong programa nga gipatuman daghan usab karon nagpuyo sa dakbayan nga mga polis nga gidestino sa kalungsoran gikatakdang ipabalhin sa MCPO. (BANAT NEWS)