CEBU, Philippines - Nakabsan sa kinabuhi ang usa ka lalaki human kini pauwani og mga bala sa wala hiilhing kriminal didto sa sitio Mansanitas, barangay Inayawan, ning dakbayan sa Sugbo kagahapon sa alas 4:00 sa kaadlawon.
Ang biktima nailhan nga si Lewin Paraiso, hingkod, nga nagpuyo sa nahisgutang barangay.
Sa inisyal nga imbestigasyon sa kapolisan nasayran nga ang biktima naglakaw sa nahisgutang lugar dihang kalit lang kining gibanhigan sa wala hiilhing kriminal ug mipauwan kaniya og bala. Human matumba sa yuta, misibat usab dayon ang kriminal.
Gihatod usab dayon sa mga barangay tanod ang biktima ngadto sa Cebu City Medical Center diin didto kini kabsi sa kinabuhi.
Si SPO3 Rey Cuyos sa homicide section sa Cebu City Police Office mibutyag nga nakadawat sila og impormasyon nga may record na sa barangay ang biktima bahin sa kasong pangawat.
Sa pagkakaron padayon pang gipangita sa kapolisan ang kriminal. (BANAT NEWS)