Alay Lakad ilusad karon

CEBU, Philippines - Gilauman nga may 10,000 ka mga tawo ang mosalmot sa Alay Lakad karong adlawa nga gipasiugdahan sa kagamhanan sa dakbayan sa Talisay.

Si Felipa Solana ang hepe sa city social welfare office sa Talisay nagkanayon nga sama sa gihapon, ang matigom nga kwarta sa maong kalihokan igasto sa mga scholar sa Alay Lakad.Ang siyudad adunay 314 ka mga scholar nga nagtungha sa Talisay City College karon.

Ang maong kalihokan adunay ipanghatag nga pahalipay alang sa biggest contingent, most colorful ug ang labing bata ug tigulang nga mosalmot.

Ang “earliest bird” award gitangtang karong tuiga tungod kay nabantayan nga dunay mga grupo nga Sabado pa lang sa gabii, sa dayon nang Alay Lakad sa pagkabuntag sa adlawng Domingo, mag-atang nang daan sa lugar nga abotanan sa    mga mosalmot sa kalihokan. Ang registration fee sa mga mosalmot, P20 sa mga hamtong, P10 sa mga estudyante sa high school ug P5 alang sa elementarya o grade schoolers.

Usa sa assembly area   mao  ang Gaisano Fiesta Mall sa barangay Tabunok ug ang ikaduha mao ang sa Cebu South Coastal Road sa intersection sa barangay Lawaan sa alas 5:00 sa buntag ug magsugod og lakaw sa alas 5:30 paingon ngadto sa Talisay City Central School sa barangay Poblacion diin ipahigayon ang programa. (BANATNEWS)