Polis nagduda sa report sa New Zealand bahin sa 'sex slavery'

ILOILO CITY, Philippines  – Adunay pagduda ang mga imbestigador sa kapolisan sa dakbayan sa Iloilo sa migawas nga balita sa usa ka pamantalaan sa New Zealand nga gi-report sa usa ka Lincoln Tan nga napublikar sa New Zealand Herald nga gihimong sex slave ang usa ka 39-anyos nga babayeng si Mary Elizabeth Jones human siya dagita dinhi.

Si Senior Supt. Marietto Valerio, Iloilo City Police director nagkanayon nga ilaha karong gisubay ang maong report nga diin gipasangil sa maong babaye nga nailad siya sa imbitasyon diha sa Facebook aron motuon og martial arts dinhi niadtong Oktubre.

Sumala pa sa alegasyon sa maong langyaw nga gisulod siya sa usa ka gamay ug hugaw nga lawak sulod sa lima ug tunga ka bulan ug gihimo siyang sex slave. Matud pa sa pasangil sa maong babaye siyam ka mga lalaki matag adlaw ang mogamit kaniya.

Ang maong balita migawas sa maong nasud niadtong Septiyembre 20, 2011 issue sa New Zealand Herald nga gipublikar sa Auckland, New Zealand ug gikunsiderar nga labing dakong pamantalaan sa maong nasud.

Sumala pa sa alegasyon niini sa maong report, “she was visited by up to nine men a day and forced to have sex with them. Each paid 5000 pesos ($140).” Matud pa niya misuway unta siya pag-ikyas apan kanunay siyang masakpan ug kulatahon maong nangapangag ang iyang mga ngipon.

 “And after months of torment and starvation, which left her too weak to stand, she was dragged from the room and dumped on the streets of Manila ,” matud pa sa report.

Base sa gihimong pakisusi sa kapolisan, miabot sa Iloilo si Jones niadtong Pebrero 3, 2011 ug mi-check in sa Eros Pension House sa Gen. Luna St. pagkasunod adlaw nga usa sa labing busy nga dalan sa siyudad ug pipila lang ka metros gikan sa Iloilo City Police Office (ICPO) headquarters.

Giingong adunay kaubang lalaking gituohang uyab niini si Jones dihang sila mi-check in sa maong pension house ug mi-check out silang duha niadtong Pebrero 6. Apan usa ka adlaw sa wala pa kini mo-check out (Pebrero 5) nangayo og tabang sa kapolisan ang mga kawani sa maong pension house tungod sa babayeng naghilak sa usa sa ilang mga lawak.

Dihang ilang gisusi si Jones kini base sa gipublikar nga hulagway niini sa maong pamantalaan, ang maong babaye giingong misulti kanila nga milakaw ang iyang ‘boyfriend’ nga usa ka Mr. Didulo ug wala pa siya makakaon apan walay kwartang ikabayad kay gidala niini ang iyang kwarta.

Hinungdan nga gitawgan sa kapolisan ang maong lalaki nga miabot dayon sa maong pension house,

“After February 6, we don’t know what happened,” matud pa ni Valerio. Base usab sa immigration records, si Jones mibiya sa Manila balik sa New Zealand niadtong Abril 13, 2011 luwan sa Qantas airline.

Usa sa nakapaduda kang Valerio mao ang pangangkon niini nga sa edad nga 39-anyos makaagwanta kini og siyam ka lalaki matag adlaw nga makighilawas kaniya. Siya midugang nga lisod tuohang adunay mobayad og P5,000 sa susama og edad. “We’re not saying it’s impossible. We’re just basing our judgment on the current trend,” pasabot pang Valerio. (BANATNEWS)