CEBU, Philippines - Daghang mga sumasakay ug motorista ang nagbagulbol kagahapon human mangalangay sa ilang mga lakaw ug biyahe tungod sa pagpasirado sa pipila ka mga dagkong dalan sa downtown area tungod sa ikaduhang Road Revolution nga gipasiugdahan sa grupo sa mga environmentalist sa Sugbo.
Ang mga pasahero nasagmuyo ilabi na niadtong wala makahibalong adunay re-routing nga himuon kagahapon tungod kay naglibog sila asa nila makit-an ang masakyan.
Napuno sa mga biseklita ang maong dalan kagahapon lakip na kabataang nagdagan-dagan ug nag-skate boarding.
“Uyon ko aning programaha kay dili samok tan-awon ang dalan, hinaut nga mosabot lang unta ang ubang tawo,” sumala pa sa usa ka youth leader nga si Ernelle Maresenia nga nahinabi sa Banat News kagahapon.
Apan sa mga motorista ug pasaherong nahasol misaway niini ug misugyot nga adto kini angayang himuon sa dili nag-unang kadalanan sa siyudad.
Matud pa sa usa ka drayber sa PUJ nga si Lloyd Casecson nga nalangan ang iyang pagbiyahe ug misugyot nga sa sunod adto sa mingaw nga dalan kini buhaton.
Ang Road Revolution nakaapekto sa kadalanan sa barangay Parian, Sto. Niño, T. Padilla ug Tinago.
Si Atty. Antonio Oposa nagkanayon nga mapasalamaton siya sa nagkadaiyang grupo nga misuporta sa maong programa ilabi na sa kabatan-onan ug uban pa tungod sa kadako sa kontribusyon ang nahatag sa mga Sugbuanon sa pagprotektar sa kalikupan. (BANATNEWS)