150 paresan nag 'I Do'

CEBU, Philippines - Kapin usa ka gatos ka mga paresan ang nagbinayloay sa ilang “I do” kagahapon sa gihimong mass wedding nga gipasiugdahan sa dakbayan sa Sugbu diha sa Cebu Metropolitan Cathedral kagahapon.

Kini bisan paman sa kagrabe sa nahimong kahasol sa gipasiugdahang Road Revolution 2 sa usa ka environmental group nga nakapalangay sa mga sumasakay ug sa mga bisita sa mga kinasal.

Mao na kini ang ika-unom ka higayon nga gihimo sa dakbayan ang mass wedding nga gipasiugdahan sa siyudad pinaagi sa Cebu City Women’s and Family Affairs Commission. 

Ang 150 ka paresan opisyal nga gibendisyonan isip legal sa mata sa tawo ug sa mata sa Diyos isip magtiayon ni Msgr. Roberto Alesna inabagan sa co-celebrant nga si Father Benjie Herrera.

Dose ka mga paresan usab sa mga opisyales sa dakbayan ug city hall department heads ang mibarog isip mga principal sponsors pinangulohan ni Mayor Michael Rama ug City Councilor Lea Ouano-Japson nga maoy chairwoman sa women’s commission.

Ang dakbayan maoy miabaga sa mga galastuhan diha sa simbahan lakip na sa reception nga gihimo diha sa Plaza Independencia. Lakip sa gilibre sa dakbayan ang bayrunon sa city health requirements. Mapasalamaton usab si Councilor Lea Ouano-Japson kang Cebu Archbishop Jose Palma kinsa maoy miabaga sa church banns.

 “Sa una man gud, daghan og interested nga couples but magproblema sila kay bisan gilibre na sa City ang ilang requirements, maglisud sad sila og bayad sa tawag sa simbahan mao to nga nihangyo ta and thankful kaayo ang 150 couples sa tabang sa simbahan,” matud pang Japson.

Samtang ang uban sa mga bride nagsabak na pagpaso sa altar nakahilak sila sa kasayurang nabendisyonan na ang ilang panagpuyo sud sa dugay’ng panahon.

Aduna say gihatag nga pahalipay ang dunay labing daghan og anak, labing dugay ug romantikong “kiss”; labing unang nakakompleto sa papeles ug ang labing edaran na nga nagpakasal. (BANATNEWS)