CEBU, Philippines - Gibana-banang mokabat sa P120 mil nga nagkadaiyang isda ang gisakmit sa Cebu Anti-Illegal Fishing Task Force sa miaging kaadlawon sa barangay Cotcot lungsod sa Lilo-an.
Ang 48 ka banyera sa mga nagkadaiyang klase sa isda gisakay sa usa ka truck nga adunay plakang GXR-990 nga gimaneho ni Melito Sanjorjo.
Matud pa sa usa sa mga sakop sa Cebu anti-Illegal Fishing Task Force nga nagdumili sa pagpahingalan nga nakadawat sila og impormasyon kalabot na usab sa gidinamitang isda nga dad-on sa dakbayan sa Sugbu gikan sa Hagnaya, San Remegio.
Tuod man ang usa ka trak nga adunay kargang 241 ka banyerang mga isda ug nasuta sa inspeksyon nga 48 ka banyera niini nakuha pinaagi sa dinamita.
Ang lalawigan sa Sugbu mihingusog sa kampanya batok sa ilegal nga pamaagi sa pangisda pinaagi sa ‘market denial’ nga taktika nga diin dili palutson ang isdang nakuha sa ilegal nga pamaagi aron hunongon sa mga mananagat ang ilegal nga pangisda. (BANATNEWS)