Alvarino gipabawna'g P800 mil?

CEBU, Philippines - Usa ka suspetsadong druglord sa sitio Riverside sa barangay Zapatera ning siyudad sa Sugbo nga gisikop sa mga ahente sa Philippine Drug Enforcement Agency (PDEA) Central Visayas niadtong Miyerkules sa gabii apan gikatahong gibuhian human kuno makabayad og P800 mil agi og pabawon  sa gipalagpot kang Regional Director Adrian Alvarino sa PDEA.

Ang suspetsadong drug lord nga nasikop giila nga si Yongyong Vilaceran Subay nga taga Riverside, Zapatera.

Sumala sa mga mensahe sa text nga gipakatap ngadto sa mga reporter nagbutyag nga human makabayad og P800 mil, gibuhian lang usab dayon si Vilaceran.

Giingon nga ang maong bayad maoy gipabawon kang Alvarino nga gipulihan na karon ni Regional Director Jigger Montallana human sa yanong seremonyas  nga turn over niadtong Huwebes.

Giingon sa maong report nga si Vilaceran nasakmitan   og walo ka bultong shabu . Samtang si Alvarino nga buot untang kuhaan og pamahayag kagahapon sa udto didto sa buhatan sa PDEA nagdumili paghatag sa iyang reaksyon sa maong pasangil kaniya. Apan si Jessie Tabanao tigpamaba sa PDEA mikonpirmar nga adunay gipahigayong buy bust operation niadtong Miyerkules sa gabii sa maong lugar apan ang target nakaikyas.

Matud ni Tabanao nga ang nadakpan , usa ka panday apan ilang gibuhian kay   wala kini masakmiti og gidiling drugas.

Apan si Tabanao wala na mohatag og dugang pang impormasyon sanglit matud pa niya wala siya makakuyog sa maong operasyon.

Matud pa niya nga human sa buybust operation niadtong Miyerkules, ang grupo nila ni Intelligence Officer 5 George Cansancio mipahigayon og laing buy bust operation sa sitio San Miguel sa barangay Apas diin nadakpan nila si Maria Shiela Pascual kinsa nasakmitan og duha ka putos   nga shabu

Si Montallana nga nahinabi sa mga tigbalita miingon nga siya mismo maoy mohimo og imbestigasyon sa maong pasangil.

Iyang giklaro nga sa iyang pagdumala karon sa PDEA wala siyay pasayloon nga mga sakop kun ugaling magbinuang sa ilang mga operasyon.

Karong sunod semana si Montallana molibot sa tanang Local Government Unit (LGU’s) dinhi sa Central Visayas aron siya makig tie-up ug sa kapolisan sa pakigbatok sa illegal nga kalihokan bahin sa drugas. Giangkon niya nga dako kaayo og ikatabang ang mga LGU’s sa ilang kampanya sa drugas kay nakahibawo sila kun si kinsa ang mga tawong nalambigit sa pagpamaligya og ginadiling drugas sa ilang tagsa-tagsa ka lugar. (BANATNEWS)