CEBU, Philippines - Way kamatuoran ang taho nga adunay outbreak sa sakit nga tipos sa barangay Basak dakbayan sa Lapulapu diin mikalas og upat ka kinabuhi.
Kini ang giluwatang pamahayag ni Dr. Rodolfo Berame ang City Health Officer sa dakbayan sa Lapulapu nga nahinabi sa Banat News.
Matud pa ni Berame nga dunay namatay sa milabay’ng adlaw gikan sa Basak apan dili sa sakit nga tipos.
Base sa death certificate nga iyang gipirmahan ang hinungdan sa kamatayon sa maong tawo mao ang sakit nga patol nga mikumplikar na ngadto sa tumor sa utok hinungdan nga grabe na kini ug namatay.
Iyaha kining giklaro human siya makadawat og tawag ni Rolando Duero ang City Secretary sa dakbayan sa Lapulapu nga nagpakisayod kalabot sa pamahayag ni Basak barangay Kapitan Isabelito Darnayla nga dunay upat ka tawo sa iyang barangay ang namatay sa sakit nga tipos.
Matud pa ni Berame base sa pamahayag sa iyang district doctor nga si Dr. Susan Damule nga maoy nadistino sa Basak walay susamang kaso nga ilang nadawat sa maong barangay.
Nagtuo hinuon si Berame nga adunay tawong sayop og nahatag nga impormasyon kang Darnayla nga maoy gibasehan sa naulahi nga iyang gipadayag sa mga sakop sa media. (BANATNEWS)