CEBU, Philippines - Nanaug na gyud kagahapon alas 4:45 sa kaadlawon gikan sa tumoy sa usa ka punoan sa duldol ang 34-anyos nga gituohang nalisoan sa pangisip nga unang gikaingong nayabag tungod sa pagpangita og tuko.
Kini human hasta iyang mga silingan ug mga nanguryusong mga tawo diha sa ubos wala na makaagwanta ug gisigehan kini og sungog ug gisegihan og uyog ug labay og bato kaniya.
Tungod sa kalagot ni Ricky Empanso, 34, residente sa barangay Cogon, Cordova mikanaog kini sa maong punoan ug diha-diha daling gisikop sa mga polis ug gidala sa presinto.
Ang maong punoan sa duldol gibanabanang 60 ka tiil gikatkat ni Empanso niadto pang Miyerkules sa alas 5:00 sa buntag.
Siya una nang gisumbong sa mga polis tungod sa pagpangguba niini sa mga pantyon sa sementeryo sa nakalabay’ng adlaw tungod sa pagtuo niini nga diha nanago ang mga tuko.
Giingong nanghagis usab kini sa iyang asawa ug mga anak ug gipangsuwayan og hapos og bugsay apan gigukod sa mga awtoridad maong mikatkat kini sa maong kahoy.
Matud ni SPO1 Danny Alburo, desk officer sa Cordova Police Station dihang nahinabi sa Banat News nga ilahang susihon ang ilang nadawat nga report nga tigamitan og gidiling drugas si Empanso.
Ang mga polis nagbanosbanos og bantay ug mga bombero diha sa maong punoan dungan sa pakignegosasyon nga kini pakanaugon.
Matud ni Alburo nahagit si Empanso sa gibuhat kaniya sa mga tawo ug dihang nakakanaog diriyot pa kining makabawos sa mga tawo tungod kay midiretso kini og punit og duha ka bato apan dihang giduol sa mga polis nakigdakpanay pa kini libot sa usa ka panimalay.
Kagahapon sa alas 8:00 sa buntag gidala sa PNP Crime Laboratory alang sa drug test si Empanso ug pagkahuman gipahiling sa usa ka psychiatrist sa Vicente Sotto Memorial Medical Center (VSMMC) aron pagtino kun tinuoray ba kining dunay deperensiya sa pangisip. (EIM) (BANATNEWS)