Lisensya ni Byron sa AK-47 i-revoke

CEBU, Philippines - Nakaduso na og incident report sa Cebu Provincial Police Office ang hepe sa kapulisan sa dakbayan sa Talisay nga si Supt. Eddie Recamara may labot sa giingong pagpanion sa igsuon ni Gob. Gwendolyn Garcia nga si Byron Garcia og AK-47 ngadto sa langyaw nga si Wyane Morris niadtong Domingo sa buntag diha sa Corona Del Mar sa barangay Pooc sa maong dakbayan.

Si Sr. Supt. Patrocinio Comendador mitug-an nga base sa imbestigasyon sa kapulisan sa Talisay kasong slight threat ang mamahimong ipasaka una ngadto sa barangay.

Apan kung dili mahilot ang maong panagbangi tali ni Byron ug Morris ilang tabangan ang langyaw sa pagpasaka og kaso ngadto sa piskaliya kun ugaling interesado kini.

“Recamara submitted to me the incident report of what really transpired last Sunday, it goes to barangay first,” sumala pa niya.

Nagpaabot pa usab sila sa Firearms Explosives Security Agencies Guards and Supervision Section (FESAGSS) kun pasakaan og kasong illegal possession of firearms si Byron apan iyang gipasabot nga mahimo nang malakip sa kaso unya kung mapasaka ang kasong light threat ngadto sa korte.

Sa iyang bahin, si Supt. Rex Derilo, hepe sa FESAGSS-7 nga nahinabi sa mga tigbalita nagkanayon nga mopadala sila og rekomendasyon sa ulohan nilang buhatan ang pagpa-revoke sa lisensya sa armas nga AK-47 ni Byron.

Boluntaryong gitahan ni Byron niadtong Lunes ang AK-47 ngadto sa FESAGSS lakip ang lisensya niini ug nasuta nga wala kini Permit to Carry Firearms Outside Residence (PTCFOR). (BANATNEWS)