Bata-bata sa abogado nagwara-wara'g armas

CEBU, Philippines -  Usa ka lalaki nga nagpailang batabata sa usa ka abogado ang gidakop sa kapulisan human gialarma tungod sa pagdala og armas nga hubog kagahapon sa tungang gabii diha sa usa ka imnanan sa dalan Ramos sa barangay Sta. Cruz siyudad sa Sugbu.

Nagtingkagol sa karsel sa Fuente Police Station mao si Rogelio Bendamillo Jr., 37, taga barangay Pundol sa lungsod sa Aloguinsan kinsa nakuhaan og .45 nga kalibre nga pistola nga may lima ka buhing bala.

Sumala pa nga giwara-wara niini sa mga tawo tungod sa kahubog ang maong armas hinungdan gipadakop kini.

Si Bendamillo nga nangangkong batabata siya sa usa ka abogado apan napakyas siya sa pagpakita og mga dokumento nga nagpamatuod nga legal ang pagdala niya sa maong armas.

Matud ni PO3 Nilo Piedad sa Fuente Police Station nga mianha sa ilang buhatan ang usa ka abogado ug giangkon hinuon nga iyang batabata si Bendamillo.

Kasong illegal possession of firearms and ammunition ang gikatakdang ipasaka sa kapulisan batok kang Bendamillo. (BANAT NEWS)