CEBU, Philippines - Gipadayag sa kahugpungan sa mga Obispo ug kaparian dinhi sa Central Visayas nga padayon pa gihapong wala mahingpit ang tinuoray nga kagawasan sa nasud human sa martial law nga gipatuman sa nilabay’ng diktadoriyang Marcos 39 ka tuig na ang nilabay.
Mao kini gipalanog nga sentimento sa Visayas Clergy Discernment Group (VCDG) atol sa paghandom sa ika-39 ka tuig nga deklarasyon sa Martial Law sa nasud kagahapong adlawa.
Matud ni Bishop Gerardo Alminaza, head convenor sa VCDG hangtud karun daghan sa mga biktima sa panaugdaug atol sa Martial Law ang wala gihapon makaangkon og hustisya.
Gawas niini kadaghanan sa mga biktima ang wala gihapon makapahimulos sa gitanyag sa gobiyerno nga compensation.
Usa sa gibasihan ni Alminaza ang nahitabong pagpatay ni Fr. Cecilio Lucero ang kora paroko sa Diocese of Catarman nga gituohan nilang gipatay sa militar niadtong petsa 6 sa Septiyembre 2009 nga hangtud karun walay nataral sa hukmanan.
Gilabtikan sab sa VCDG ang pagdakop ug pagpriso sa 36 ka mga mag-uuma sa lungsod sa Aloguinsan nga igo lang mipugong sa pagpakoral sa usa ka adunahang pamilya sa ilang gitikad nga uma.
Gihagit sa VCDG si Presidente Benigno Noynoy Aquino III pagsumpo niining gihulagway nilang nagpadayong pagpangabuso sa katawhan nga maoy gihingusgan sa iyang mga ginikanan nga sila si kanhi presidente Corazon Aquino nga gibansagang icon of democracy ug sa amahang si kanhi senador Benigno Ninoy Aquino Jr.(EIM)(BANAT NEWS)