CEBU, Philippines - Nadakpan sa buy bust operation sa kapolisan ang anak sa barangay tanod sa Mantuyong, dakbayan sa Mandaue ug ang kapuyo niini alas 9 pasado ang takna sa miaging gabii.
Kini maoy nadugang sa dinakpan sa kapolisan sa ilang kampanya kontra ilegal nga drugas human una nilang nadakpan ang job order sa Mandaue City Hall nga si Roy Rodriguez, 43, taga dalan B. Ceniza sa barangay Mantuyong sa maong dakbayan.
Si Rodriguez sakop sa Janitorial Security Service Unit (JASSU) isip market guard sa dakbayan nadakpan sa mga sakop sa City Anti Illegal Drugs Task Force (CAIDSOTF) sa buy bust operation nga gipahigayon niadtong miaging kaadlawon.
Sunod nga nadakpan ang managpuyong sila si Wendell Demapi, 26, anak sa barangay tanod ug ang kapuyo nga si Irene Bughaw, 19.
Si PO1 Earl Fomador sa kapolisan sa Presinto 1 sa Centro Police Station sa Mandaue City Police Office (MCPO) miingon nga nasakmit gikan kang Demapi ang usa ka plastic nga gituohang shabu ug ingon ang P200 nga buy bust money.
Matud pa ni Chief Insp. Jesus Elmer Fernandez ang hepe sa Station 1 sa MCPO nga dugay na nilang gipanid-an ang kalihukan sa duha nga ang modus operandi, lain ang mokuha sa kwarta ug lain usab ang mohatag sa illegal nga drugas.
Ang buy bust operation gipangulohan ni Sr. Insp. Mark Edward Barios gamit ang P200 nga marked money nga miresulta sa pagkasikod sa duha. Si Demape maoy gikatahong mitunol sa ilegal nga drugas (shabu). Nakuhaan usab sila og dugang usa ka paketeng gituhoang shabu ug ang marked money. Ang duha kasohan og kalapasan sa Section 5 sa RA 9165.(EIM)(BANAT NEWS)