CEBU, Philippines - Si 6th district Congressman Gabriel Luis Luigi Quisumbing midayeg sa Ubos Balay Balaoranan nga gipangulohan ni Speaker Feliciano “Sonny” Belmote ug House Committee on Appropriations Chairman Jun Abaya sa dali nga pag-uyon sa 2012 General Appropriations Bill nga mao ang House Bill 5023.
Matud pa ni Quisumbing nga niadto pang Septiyembre 16, 2011 gipasar sa kongreso ang 2012 national budget nga nagkantidad og P1.816 trilyones human sa subsob nga deliberasyon sa mga miyembro sa House Committee on Appropriation.
“As a member of the House Committee on Appropriations, I express gratitude to my colleagues, especially the members of the committee as well as the executive agencies in working overtime to discuss thoroughly the proposed national budget”, matud pa ni Quisumbing.
Gidayeg usab ni Quisumbing ang administrasyon ni Presidente Noynoy Aquino sa maayong pagkadumala sa kongreso aron matuman ang dakong kaakohan sa administrasyon niini sa pagpalambo sa kahimtang sa panginabuhi sa mga kabos ug pagtabang sa pagkunhod sa kapobrehon sa tibuok nasud.
Nasayran nga alang sa tuig 2012, makita sa General Appropriations Bill ang umentadong gahin sa matag usa sa tulo ka dagkong isla sa nasud.
Ang Mindanao maoy may labing taas nga usbaw sa gahin nga mokabat sa 32.9 porsento, samtang ang gahin sa Visayas misaka og 31.0 porsento ug sa Luzon 25.7 porsento usab.
Sigun pa ni Quisumbing nga sa maong usbaw sa budget, makasiguro na sila nga ikapatuman na sa hingpit ang mga proyekto alang sa economic and social services nga maoy prayoridad karon sa nasudnong kagamhanan.
“I am optimistic that before Congress adjourns session on October 15, 2011, the 2012 national budget will have to be approved by both Houses”, dugang pa ni. Quisumbing. (BANAT NEWS)