Mga kapitan sa barangay ipa-drug test

CEBU, Philippines -  Naglaraw si Provincial Board member Jose Rebomapil Joey Boy Holganza Jr. kinsa maoy ABC Federation President sa probinsiya sa Sugbo nga ipaubos sa drug testing ang tanang mga barangay kapitan sa lalawigan.

Kini aron pagsiguro nga walay bisan usa sa maong mga opisyal nga tiggamitan og ginadiling drugas ug posibling nagumon na sa maong bisyo.

Ang laraw ni Holganza mitumaw human masakpi si Konsehal Bienvenido Paslon sa barangay Sacsac, lungsod sa Pinamungajan nga nalambigit sa ginadiling drugas.

Si Paslon nasakmitan sa mga otoridad og 12 ka bulto sa illegal drugs didto sa balay niini sa Villagonzalo II, sa barangay Tejero siyudad sa Sugbo atol sa gipahigayong ronda sa kapolisan.

Sumala pa ni Holganza nga dili siya buot nga ang mga barangay kapitan malambigit sa illegal nga drugas tungod kay usa man kini sa mga gihingusgan nga kampanya ni Governor Gwendolyn Garcia nga gukdon   ang mga nalambigit sa illegal nga drugas.

Gipasabot ni Holganza nga ang maong kalihukan maoy maglimpyo sa mga barangay official gikan sa maot nga dungog ilabi na sa paggamit sa gidiling drugas.

Hinuon gihan-ay pa karon ni Holganza ang maong lakang ug magpakitabang siya sa buhatan sa gobernador alang sa hingpit nga katumanan sa maong laraw.(WC) (BANAT NEWS)