Recamara ipermanente sa Talisay?

CEBU, Philippines -  Si Mayor Socrates Fernandez sa dakbayan sa Talisay giingong mihangyo sa konseho sa siyudad nga mopasar og resolusyon aron si Supt. Eddie Recamara mapermanente nang hepe sa Talisay City Police Station.

Ang maong hangyo sa mayor giingong gihimo atol sa miting sa mga department head apan si Bise Mayor Alan Bucao kinsa maoy chairman sa komitiba sa kahapsay ug kalinaw mibutyag sa mga tigbalita kagahapon nga hangtud kagahapon wala pa siya makadawat sa maong hangyo sa mayor.

Si Bucao mitug-an usab nga dili siya tigtambongan sa miting sa mga department head busa kun didto kini ihangyo sa mayor wala gayud siyay kalibotan niini.

Matud ni Bucao nga kun mao may katuyoang ipermanente si Recamara isip hepe sa kapolisan sa Talisay, siya isip tsirman sa committee on peace and order mokunsulta una niini ngadto sa iyang mga sakop .

Gawas niini ang bise mayor miingon nga mohimo usab siya og evaluation bahin sa mahimong reaction sa mga negosyante sa dakbayan kansang pulso maoy iyang basehan kun angay bang ipermanenteng hepe sa kapolisan sa dakbayan si Recamara.

Hinuon si Bucao nagkanayon nga nakita niya nga adunay nahimo usab nga kaayohan si Recamara sa Talisay apan dili usab kalikayan nga adunay mosaway niini.

Sa laing bahin, si manlalaban Zanro Oriol, tigpamaba sa National Police Commission (NAPOLCOM) nagkanayon nga ang Cebu Provincial Police Headquarters adunay gidusong lima ka ngalan sa iyang buhatan apan wala niya ibutyag   kun kinsa kini.

Human ma-review ang ilang qualification gihandos dayon kini sa NAPOLCOM og balik ngadto   sa provincial headquarters   aron papilian sa mayor sa Talisay.

Wala   kakuhai sa Banat News og pamahayag si Mayor Fernandez kalabot niini kay dili siya makontak sa iyang cell phone. (BANAT NEWS)