Kombinsidong ang minor ang mipatay

CEBU, Philippines - Ang bana ug amahan sa mga biktimang gipatay sa 16-anyos nga bata ang kombinsidong ang menor de edad gyud ang mibuhat sa maong krimen sumala pa sa hepe sa kapolisan sa Naga City Police Station nga si Chief Inspector Timar Alam.

Si Alam mibutyag nga sa una naglisod pagtuo si Raul Bantilan, ang bana ni Virgineta ug amahan sa 5-anyos nilang anak nga babaye ug sa gimabdos niini, nga ang 16-anyos ang mihimo sa krimen.

Apan human ilang gipakita sa mga ebidensiya sama sa sininang nagkadugo, cellphone ug uban pa diha pa mituo si Bantilan nga iyang humagbos maoy nagbuhat sa krimen.  

Wala pa makahuna-huna si Bantilan kung mobarog ba kini isip reklamante batok sa iyang humagbos apan ang mga igsuon ni Virgineta nagtuong laing tawo mihimo sa krimen.

Kagahapon sa hapon gilubong ang duha sa Saint Francis of Assisi Parish Naga Catholic Cemetery sa barangay West Poblacion.

Si Bantilan hilom kaayo sa misa apan emosyonal kini dihang padulong nang ilubong ang iyang pamilya. Ang manag-inahan gipatay sulod sa ilang balay sa barangay Naalad sa milabay’ng semana. (BANAT NEWS)