CEBU, Philippines - Gidakop sa kapolisan ang usa ka Briton pinaagi sa usa ka warrant of arrest diha sa lungsod sa Liloan gumikan sa kasong carnapping nga nahitabo didto sa Isla sa Camiguin.
Ang gisikop mao si Colin Tallman, 56, adunay laing kapuyo sa lungsod sa Liloan.
Matud pa ni SPO4 Alex Pepito, si Tallman gisikop sa milabay’ng hapon human sila makadawat og kopya sa warrant of arrest nga giluwatan ni Mambajao Executive Judge Rustico Paranga sa Mambajao RTC branch 28 sa kasong carnapping niadtong Agosto 28, 2011.
Ang kaso gipasaka sa iyang asawa nga residente sa Mambajao nga gibuwagan ni Tallman ug nakigpuyo og laing babaye sa lungsod sa Liloan.
Gumikan kay gidala ni Tallman ang awto niini gikan sa Mambajao ngadto na sa Sugbu hinungdan nga gipasakaan kini og kaso. Si Tallman anaa karon nabalhog sa Liloan police station ug pormal kini nga ipresentar ngadto sa korte sa Mambajao alang sa pagtubag sa kasong giatubang niini. (BANATNEWS)