CEBU, Philippines - Daghan pa untang mga kasong pagpanulis ang giandam sa kapolisan sa dakbayan sa Lapulapu batok sa gipatay nga si Justin Secretaria Avenceña.
Si Avenceña nga taga sitio Kagudoy sa barangay Basak, sa maong dakbayan gipatay sa duha ka wala mailhing mga lalaking nagsakay og motorsiklo sa pagkahuman niini makabutang og piyansa sa korte sa iyang kasong robbery.
Si SPO3 Nicanor Bacayo sa Presinto 5 nga nakahinabi sa Banat News lakip sa kasuhan ang kaubang Rogery Agbay Ruelo, nga taga barangay Jagobiao sa dakbayan sa Mandaue.
Daghan karong anggulo nga gisusi sa mga imbestigador sa pagbanhig kang Avenceña nga naglakip sa kalambigitan sa mga vigilantes, panimalos sa mga biktima o ba kaha giunay kini sa iyang mga kaubang mga tulisan sa pagtuong mipiyait kini sa mga pagpanulis nga ilang gihimo.
Matud pa ni Bacayo daghan na ang mga nabiktima nila ni Avencena ug Ruelo nga naglakip sa Mandaue ug Lapulapu ingon man sa silingang lungsod.
Si Bacayo miingon nga human ikataho ang nahitabong pagkadakop kang Avencena ug Ruelo sa miaging semana daghan na usab sa mga biktima ang miduol sa ilang buhatan ug mitumbok sa duha ug kasagaran nagtinguha gyud sa pagpasaka og kaso.
Si Ruelo nagpabilin pa karon sa bilanggoan ug gituohang nagpanagana pagpiyansa sa kabalakang mahitabo kaniya ang gidangatan sa kauban (Avenceña).
Ang uwahing nabiktima sa duha mao ang duha ka kawani sa Mactan Cebu International Airport nga miresulta sa ilang pagkasikop. (EIM) (BANATNEWS)