Nagmaskarang tulisan misakiyo'g P30 mil

CEBU, Philippines - Dul-an sa P30 mil ang nasakiyo sa tulo ka nagmaskarang tulisan kinsa mitulis sa usa ka grocery store nga gipanag-iya sa usa ka konsehal didto sa P. Rodriquez St., Poblacion siyudad sa Bogo niadtong Domingo sa hapon.

Ang gitulis mao ang GYA Grocery Store nga gipanag-iya ni konsehal Leondon Acusar sa dakbayan sa Bogo.

Samtang walay usa sa mga tindera nga nakaila sa mga tulisan tungod kay pulos kini nagmaskara nga nag-angkas og motorsiklo.

Si PO2 Joseph Salvador sa Bogo City Police Station mibutyag sa Banat News nga walay nakabantay sa maong   mga tulisan kinsa kalit lang misulod sa tindahan   ug sa didto na sulod milanit dayon sa ilang mga armas de fuego ug mipahibawo nga tulis.

Busa tungod sa kalisang, ang mga customer ug mga tindera wala  kini makalihok ug ang usa sa mga tulisan maoy miduol sa cashier ug gisakiyo ang tanang halin sulod sa kaha nga mikantidad og P26 mil.

Human makuha ang kuwarta, abtik kaayong nanibat ang mga tulisan pahilayo gikan sa maong lugar. Sa follow-up kagahapon nga gihimo sa kapolisan nailhan na ang tag-iya sa motorsiklong   gisakyan sa mga tulisan pinaagi sa plate number niini.

Gipangita na karon sa kapolisan ang mga tulisan. (BANATNEWS)