Tag-iya sa luna sa nasunogan sa apas mireklamo

CEBU, Philippines - Miangal ang tag-iya sa 646 square meters nga yuta nga naigo sa sunog sa sitio Baka sa barangay Apas ning dakbayan sa miaging adlaw gumikan kay duna nay ubang mga biktima sa trahedya ang nagsugod na sa pagtukod og balik og balay sa ilang pwesto.

Sumala pa ni Ruth Visayas, representante sa mga kabanay nga Go nga maoy tag-iya sa yuta nga gusto nila nga makigdiyalogo sa mga biktima sa sunog ug mohimo og solusyon.

Dugang pa niya nga dili unta dayon puy-an ang yuta sanglit pribado man kini apan iyang giklaro nga makapuyo gihapon sila og balik kung makaumol na sila og kasabotan atol sa diyalogo.

“Depende na sa dagan sa dialogue, kung unsa ang gusto nila nga mahitabo. Mag-abang ba ron sila sa yuta ug uban pa nga solutions,” matud pa ni Visayas.

Nagkanayon si Visayas nga duna siya’y nadunggan nga ubang mga residente sa maong dapit nagpaabang og balay ug gani wala kini mananghid sa tag-iya sa yuta.

Apan si Kagawad Allan Majait sa barangay Apas misaysay nga nagka-estorya na sila ni Mayor Michael Rama sa maong problema ug gisuginlan na siya niini nga dili himuong rason ang sunog aron pahawaon dayon ang mga biktima sa lugar nga ilang gipuy-an.

Sumala pa ni Majait nga giapod-apod na nila ang mga construction materials ngadto sa mga biktima.

Nanghinaut si Majait nga matagaan dayon kini og kasulbaran sa daling panahon nga nagdepende sa mahitabo nga negosasyon tali sa tag-iya sa yuta ug sa mga nasunogan. (BANATNEWS)