Petisyon sa flyover sa North didto gihikay sa South

CEBU, Philippines -  “Tinalawan naman sad na.” Mao kini ang hirit ni Mayor Michael Rama sa report nga matud pa duna naghimo og petisyon sa usa ka barangay sa South District nga nagsuporta sa flyover nga proyekto sa kongresista sa North District nga si Rachel “Cutie” Del Mar.

Nakugang si Rama sa iyang nadunggan nga dunay gipakatap nga dokumento nga gipapirmahan diha sa barangay Kinasang-an nga sakop sa South District ug giatol sa feeding program.

Matud pa nga dunay mga tawong namirma apan aduna say wala mopirma tungod sa rason nga dili daw pinugsanay ang pagpapirma kanila.

Apan si Del Mar miklarong dili ang ilang kampo maoy nagpasiugda sa maong petisyon sanglit dili sakop sa iyang distrito ang Kinasang-an.

Ang South District sakop ni Kong. Tomas Osmeña nga maoy pangulo sa Bando Osmeña Pundok Kauswagan (BOPK) nga diin masakop si Del Mar.

Si Rama mibuwag na sa BOPK human sa wala nilay maayong pagsinabtanay ni Osmeña sa pipila ka mga isyu. Si Osmeña usab dayag kaayong misuporta sa flyover ni Del Mar.

“Ang problema niini karon, kay wala na’y mangangkon kung kinsa ang nagpasiugda sa maong signature campaign. Makahibulong kaayo, ang flyover ibutang sa north, unya maabot ang pinirmahay sa south, naunsa naman na?,” matud pa ni Rama.

Una nang gipadayag ni Rama nga “anti-flyover” gyud siya nga pagkatawo gumikan kay alang niya mas maayo ang road widening ug mas maayong solusyon pagsulbad sa problema sa trapiko.

Gipaningkamotan ni Rama nga dili gyud madayon ang maong flyover gumikan usab sa rason nga makaguba kini sa heritage site sa siyudad ug maapektohan usab niini ang mga negosyante kilid sa tukorong flyover.

Nasayran nga nagbaha na usab karon ang mga pribadong sektor nga misupak sa nahisgutang proyekto diin ang uban niini naglangkob sa mga grupo sa environmentalist , youth sector, transport sector ug uban pa. (BANATNEWS)