Mekaniko gipusil patay

CEBU, Philippines - Patay ang usa ka mekaniko human gipusil sa wala mailhing lalaki kagahapon sa kaadlawon sa sitio Larug sa barangay Inayawan ning dakbayan.

Ang biktima giilang si Giovanni Jimenez, 29, nga taga sitio Cabangcalan barangay Bulacao.

Sumala pa sa imbestigasyon sa kapolisan miabot nga samaran diha sa barangay hall sa Inayawan sakay sa usa ka itom nga motorsiklo ang biktima ug nangayo og tabang.

Kini gidala sa mga barangay tanod sa Cebu City Medical Center apan namatay lang gihapon kini tungod sa samad niini sa tuong bahin sa iyang dughan.

Ang asawa sa biktima nga si Virgileen Jimenez, 29, miingon nga alas- 7 sa gabii niadtong Domingo ulahi niyang nakit-an ang biktima nagmotor dungan sa usa ka ginganlan og “Intsik” nga nagmaneho usab og laing motorsiklo nga may angkas nga wala mailhing lalaki.

Matud pa ni SPO4 Rey Cuyos sa pakighinabi niini sa The Freeman igsuong pamantalaan sa Banat News nga wala pa nila matino ang motibo sa maong pagpamusil. (BANATNEWS)