Puya gisulod sa garapon gilubong

CEBU, Philippines - Usa ka puya nga gibana-banang upat pa ka buwan sa tiyan sa inahan napalgan nga gisulod og garapon   ug gilubong didto sa barangay Tipolo, dakbayan sa Mandaue   ug napalgan sa mga batan-on sa maong lugar sa miaging buntag.

Si Sr Insp. Franco Rodulf Oriol, hepe sa kapolisan sa Presinto 2 sa barangay Subangdako sa maong dakbayan mibutyag sa Banat News nga ang nakadiskobre sa maong puya mao ang grupo sa mga batan-on kinsa nagkawot og haligi sa basketball board.

Matud ni Oriol nga nakurat ang maong mga batan-on dihang nakawtan nila ang usa ka garapon   nga sa lugar nga ila untang tarokan sa poste sa basketball board.

Sa pagkakaron gipanid-an pa sa kapolisan ang inahan sa puya nga mihilog sa iyang gisabak ug milubong niini.

Wala pa masuta ang pagkatawo sa maong puya, babaye ba o kaha lalaki ba kini.

Gipalubong kini sa kapolisan og tarong sa mga tinugyanan sa city health office sa maong dakbayan. (BANAT NEWS)