ERC gibasol sa umento sa presyo sa kuryente

CEBU, Philippines - Gibasol ni Kongresista Raymond Democrito Mendoza ang Energy Regulatory Commission (ERC) gumikan sa pagtugot niini sa Visayan Electric Company (VECO) nga makapaumento sa bayranan sa kuryente ubos sa gitawag nga Performance Based Regulation (PBR) nga sistema.

Sa samang higayon miduyog usab si Mendoza sa mga Sugboanon kinsa nagbaguod na karon gumikan   sa kamahal na sa bayranan sa kuryente.

Si Mendoza    nga nagrepresentar sa Trade Union Congress of the Philippines (TUCP Party-list)    nagkanayon nga angayan unta sa ERC nga gihuna-huna ang kahimtang sa mga konsumedor una nila tugoti ang Veco nga makapausbaw sa presyo sa kuryente.

Kini tungod kay sila   maoy unang apektahan   niining bag-ong umento karon sa bayranan sa kuryente.

Ang pagsaka karon sa mga presyo sa mga palitonon maoy usa sa angayang sandigan unta sa ERC una nila tugoti ang Veco nga makapa-umento sa presyo sa bayranan sa kuryente.

Matud pa ni Mendoza nga karong misaka na usab ang bayranan sa kuryente, di kalikayang    malusno na usab ang pagsalig sa publiko ngadto  sa kagamhanan.

Busa si Mendoza wala maglangan, misang-at dayon og usa ka motion for reconsideration ngadto sa korte ug mibahad nga sa higayong dili kini hatagan og pagtagad,   adto na niya ikiha ang ERC sa Korte Suprema.   (BANAT NEWS)