CEBU, Philippines - Nabalian sa bitiis ang drayber sa motorsiklo human kini dasmagi sa misaliring nga multicab didto sa highway sa barangay Langtad, dakbayan sa Naga kagahapon sa hapon.
Ang biktima mao si Wilfredo Dela Torre, 41- taga Cantabogon, lungsod sa Aloguinsan, drayber sa motorsiklo nga nagtangag sa plakang IJ-1944 .
Samtang ang drayber sa multicab nga may plakang GPY-943 mao si Lolito Alesna, 31, nga taga barangay Kaligngan, dakbayan sa Carcar.
Si PO1 Renjie Nadora, duty desk officer sa Naga Police Station mibutyag nga base sa imbestigasyon nila ni PO1 Junaire Latorre ug PO1 Wilfredo Pada, ang biktima nagpaingon sa habagatang bahin sa lalawigan gikan sa dakbayan sa Sugbo, samtang ang multicab gikasugat niya sa maong higayon nga nagpaingon usab sa dakbayan sa Sugbo.
Matud ni Nadora nga pag-abot sa nahisgotang lugar nga nahitaboan kalit lang mibuto ang atubangang ligid sa multicab dapit sa wala hinungdan nga misaliring kini ug mitabok sa pikas lane sa karsada.
Apan nataymingan usab nga sa paglabang sa maong multicab sa pikas lane mao usay paglabay sa motorsiklo busa mipaka ang bitiis sa biktima.
Dihang gihatod ngadto sa South General Hospital sa maong dakbayan nasuta nga maayong pagkagupok sa kabukogan sa bitiis sa biktima nga maayong pagkapiit sa simod sa multicab.
Gitanggong sa kapolisan sa Naga ang drayber sa multicab samtang gipaabot ang kiha nga isang-at sa biktima batok kaniya. (BANAT NEWS)