Tensyon sa Corona Del Mar, Byron nagda'g AK-47

CEBU, Philippines - Mitumaw ang tensyon kagahapon sa buntag diha sa Corona Del Mar Subdivision, barangay Pooc, dakbayan sa Talisay dihang laing security agency sa mga gwardiya nga giingong gi-hire sa igsuon ni Gob. Gwendolyn Garcia nga si Byron Garcia nag-abot sa maong subdivision.

Si Garcia maoy presidente sa homeowners association sa maong subdivision ug giingong maoy mi-hire sa Password Security Agency aron hulipan ang Filinvest Security Agency sa developer nga Filinvest Land Inc.

Si SPO1 Nestor Canlobo, duty desk officer sa Talisay City Police Station sa pakighinabi sa Banat News kagahapon mibutyag nga si Antonio Lopez, ug subdivision administrator sa Filinvest maoy mireklamo kabahin sa maong insidente.

Matud pa niini, si Lopez mibutyag nga ang Filinvest maoy contractor sa Corona Del Mar Subdivision ug wala pa kini ma-turnover ngadto sa mga homeowners.

Tungod niini ang gwardiya sa Filinvest maoy nagbantay sa subdivision apan kagahapon sa alas-10 sa buntag nangabot ang mga sakop sa Password Security Agency nga gipanag-iya ni Romulo Aying ug buot mopuli sa mga gwardiya sa subdivision.

Apan si Lopez miingon nga walay gipakitang dokumento ang bag-ong abot nga mga gwardiya maong wala niya sila tuguting pulihan ang ilang mga gwardiya.

Sumala pa nga usa ka Amerkanong nagpuyo sa maong subdivision ang mikaratel og dagan human pakitai ni Garcia og Kalashnikov Assault Rifle (AK-47).

Sa pagkatudlo kang Garcia pagdumala sa asosasyon kagahapon buot unta kurihian sa iyang administrasyon ang mga problema sa mga molupyo.

Usa sa reklamo nga ilang naagian mao ang gibutang sa maong Amerkano nga mga babag sa karsada atubangan sa panimay niini nga giingong gireklamo sa uban.

Matud pa ni Garcia nga nasuko ang maong Amerkano ug gibinastosan siya niini hinungdan nga iyang gipakitaan sa lisensiyadong AK-47 aron paghadlok niini.

Sumala pa ni Garcia nga giingnan siya sa langyaw nga, “I don’t care who you are, you are nobody,” hinungdan nga iyang gitubag, “Yes, I am nobody but I have this,” dungan ang pagpakita sa AK-47.

Gihimakak ni Garcia nga iyang gitionan ang maong langyaw ug ang iyang pagpakita bunga lang sa iyang kapungot sa pagbinastos niini ngadto kaniya. (BANAT NEWS)