CEBU, Philippines - Duha ka batang Koreano ug ang ilang yaya ang aksidenteng napusilan sa security guard sa Korean restaurant nga Yu Lee Jeong Korean Restaurant niadtong Sabado nga anaa nahimutang sa Edison St. barangay Lahug ning siyudad sa Sugbo.
Ang biktima mao ang duha ka mag-igsuon nga si Daniel Park, 6-anyos ug Angelina Park, 2-anyos ug ang nagbantay niini nga si Merie Amarila, 26, lumad nga taga Dalaguete ning dakbayan.
Ang mga batang Koreano anak sa manager sa maong restaurant kinsa giingong nag-atiman sa iyang trabaho diha sa sulod dihang nahitabo ang aksidente.
Samtang nadakpan ang gwardiyang si John Carlos Rafols, 25, security guard sa Sikatuna Security Agency, residente sa Orchid St. barangay Capitol Site.
Matud pa ni Amarila diha sila sa parking area duol sa guard house sa nahisgutang restaurant dihang miabot ang suspek nga daw nakainom ug misulod og mga bala sa iyang armas.
Apan kalit nga mibuto ang armas ug ang bala mibanda sa mga biktima. Si Daniel naigo sa walang bahin sa iyang dughan ug paa samtang ang manghod niini nga si Angelina naigo sa tuong bukton ug tuhod.
Si Amarila naigo usab sa iyang liog ug pulos gidala sa Perpetual Soccuor Hospital . Hinuon giingong pulos splinters ra ang nakaangol nila ni Amarila ug Angelina apan si Daniel giingong adunay nasuksok nga butang sa dughan niini.
Sa pagresponde sa kapolisan nakuha gikan sa suspek ang.38 nga revolver nga dunay sulod nga lima ka buhing bala ug usa ka kabhang. (EIM) (BANAT NEWS)